اْمك اللي دمعها سال

للشاعر ..جمعه بوخبينه

ماينفعك مال ورجال........ولاملك ساعة اماتك

ماتنفعك غير لعمال........اللى درتها فى حياتك

وراك تحسب العمر مازال...فاللهو تقضى اوقاتك

ولا تغربك راحة البال......كان هى الدنيا عطاتك

مره تكسبك مال ميال....ومرات يشوى احتاتك

ياعبد لاتكون زعال.......راه صاحبك هو امراتك

ايجيك يوم فى نعش تنشال...وتندم على شى فاتك

يامن ذنوبك اثقال.......نين واكلات احسناتك

ويامن دروب الضلال......لاقط وناسى صلاتك

نوصيك وابشر بلا مال.....ان كان الوصاه الزماتك

اياك من شين لفعال.....وماللى اتواطى اصياتك

اياك مالقيل والقال......وين ماتفيض قناتك

اياك من حب لعيال.....ينسيك اللى ضناتك

امك اللى كم ميجال....من حليبها رضعاتك

امك اللى لذ لوكال......ياطول ماطعماتك

امك اللى ليلها طال.....وين غبت ياما رجاتك

امك اللى دمعها سال.....مالفرح وين انظراتك

اليوم كيف يالاك تندال.....ولاتطول فيها عناتك

اياك تنقص المكيال......ان كان بدينها طالبالتك

ودين بوك فى عام الكلال...ياما سعى فى ارضاتك

واليوم قاصره بيه لرجال..... وليام ماعلماتك

وقول ياالله يهد لجبال......وهى الطامه كان جاتك

مفيت ربنا مايدوم حال....وخوذ موعضه من امواتك

وصلى على طيب الفال....المبعوث فيها نجاتك..

» ورط اللي بعدك
» اللي عندها ضغط لا تدخل
» وفـّــر ملامــــك و النــــدم و بكــــــاك ..... فـي اللي مضى يحسـن ال