الحلقه الثالثه والثلاثون من كرسي الاعتراف .. الماس ليبيا

السلام عليكم ورحمة الله ...

العضو المميزه ألمـــاس ليبيـــا ...

وقع عليــكــِ الإختيـــار من قبل العضو وكلــي لتجلسي هذا الاسبوع

على كرسي الاعتراف ...

فأهلا بكـِ ونتمنى لكـِ جلوسا مريحا على هذا الكرسي الذي اخترناه لكـِ ..

ياربي يا ساتر هكي يا المتوكل تمشي تهرب منه وتجطني انا في مكانك هذا عشان خففت عليك في الاسئلة لكن يلا علي مرة اخري ويارب يكمل بسرعة وانتريح

......... هابا عليك بخت ... جلبتي هديتي ..... معقوله ما شفتيش هديتي مستحيل ...


....... لكن مش مشكله .......

شكرا اخي الملاك البرئ وخوذ مني هذه الوردة عشان تقعد وحدة بوحدة
مرحبا بك

منورة الكرسي الماس ان شاء الله تكوني مرتاحة الله يعينك على الاسئله
كيف حالك الماس طبعا انا عضوه جديدة ومازلت مانيش عارفة طريقة الاسئلة لكن موش راح انكثر عليك

واسئلتي هي


1 )حادثة حصلت لك وعمرك ماتقدرين تنسينها

2) ما هو طموحك في الحياة؟؟؟

ودمت بخير ولكي هدية مني

والله لوجين الكرسي يعني كويس لكن كرعي مش واصالت للأرض مع انه ادارة المنتدى عارفة اني سنفورة لكن جابولي كرس عالي يلا جت غير كرسي الاعتراف
ج1الحادثة التي مستحيل ننساها هي وانا ايام الشهادة الثانوية وكانت النتيجة تقعد شهر وماتطلع وكان الواحد يركبه السكر من فجايع امتاعت قالوا النتيجة اطلعت وكانت تطلع يوم الجمعة في صبح الخير المهم السنة هذكي كانت النتيجة زفته على الاخير وطبعا اختك الماس طلعت كتاباتها وتبي اتوتي روحها للدور الثاني واذا بالتليفون واذا به الوالد وايقولي مبروك نجاحك فرخة لاتصدق ومستحيل ننسى الفرحة بعد اليأس
ج2طموحي اني نكمل دراساتي تكون عندي اكثر من لغة
وشكرا على اسئلتك الظريفة والخفيفة وشكرا على صور القطط الحلوة وكلك ذوق حبيبتي لوجين

الماس ليبيا
1كيف تقضي معضم وقتك اليومي؟

2‏ ماهو الشي الذي يجذبك في هذا
المنتدي؟

3‏ اي قسم تجد الماس به نفسها؟

4‏ ماهي اخبار الحب؟

5‏ ماهي احلامك

6‏ مارايك في إمور بلادنا بإعتبار ثروة
من ثروات ليبيا المخفية؟
لنا عودة

مرحبا بيك الماستنا في كرسي الاعتراف

واللي تديريه في الناس ايرد عليكي

هههههههههههههههههههههههههههه

صح انتي خففتي على الاسئلة لكن كثرتيهن

وانا شفتهم كلهم القيتهم قعدوا في الكرسي الا انتي

قلت خليني نجلطها ونختارها

عموما انا توة مانبيش نسأل بس ياويلك كان سألتك وماجاوبتيش

ههههههههههههههه

نتمنى لك جلوس مريح على الكرسي

ولاني حتى انا نحب القطط مش حنهديكي اي وحدة

ولك تحيتي واحترامي

اختى الماس كما تعرفى انا جديدا فى المنتدى بس انتى دخلتى قلبى موش عشان الهديه هههههههههههههههه انا موس عارف طريقة الاسئله بس عندى سؤالين
س1) ما هى نوع الهديه ؟ ومع من تبعثيها؟
س2) ما هو شعوركى عندما حولوك للقوة العامله ؟ لانى انا جربتا فترة بس اقصيرا وحصلت واسطه وانتقلت فى الكادر لانا تصنيفهم ظلم بظلم

وعليك السلام أخي الورفلي
نقضي فيه اولا نطلع الساعة 7ونصف صباحا الي العمل في مدرسة خاصة ونرجع الساعة 1نتغدا وناخذ قيلولة وطبعا انا الوحيدة في الحوش ما عنديش خوات فا الحوسة كلها على راسي وبعدها نقرا شوي لأني نحب نقر واجد نحضر دروسي نفتح النت او بأصح نفتح منتدى السلفيوم وهكي يمشي يومي روتين يومي ممل
الشئ الذي يجذبني الي هذا المنتدى الجرأة في طرح المواضيع التي تستحق ان تناقش وبصراحة انا نستفيد منه واجد
بصراحة جميع أقسام هذا المنتدى تجذبني وتعجبني واكثر شئ خواطر سلفيومية نحس بنفسي انتأثر واجد بيهن
ههههههههههههههههههههههههههههههههههههههه تزليطة هذه انا نحب الحب وصدقني لو قتلك نحب جميع الناس ما عنديش حد نكره قلبي كبير شن نبي اندير
حلمي بسيط جدا انا اصبح من أعضاء هيئة التدريس في جامعة عمر المختار هذا هو حلمي بس
ليبيا والله ما في كيفها بس نحن عندنا شئ اسمه سوء أدارة ونضع الرجل غير المناسب في المكان المناسب وانشاء الله نحن بدين في تطورات انشاء الله غير ايصير منهن
شكرا المتوكل على الجلطة الحلوة هذه ولما تسالني حنجاوبك على جميع أسئلتك بس لأنك تحب القطط ويلا اللي يسلف السبت يلقى الأحد
مرحبتين بيك بنت العز نورتيه المنتدى خوذي راحتك ادللي ولا يهمك انجيبلك هدية حتى لو ما عطاش مفعوله القناع
الورد احلى هدية في العالم بالنسبة لي وعليش نبعثها نمشي بروحي نعطيها ما تخافيش مش ح نجيبلك وردة
انا تعينت ع طول في القوة العاملة يعني ما حسيتش نهائي بطعم الكادر لكن نخدم في مدرسة خاصة اقل ما فيها نحصل خبرة للمستقبل انشاء الله

بخصوص الهديه انا نمزح معاكى تعرفى عليك وانكون صديقه لكى اجمل هديه

وعلى الاقل انا وانتى مشتركين فى نفس الحلم وانكون من اعضاء هيئة التدريس فى الجامعه


بس نقراء حتى على حسابى الخاص اهم شى يفتحوا فى البيضاء وتحديدا فى كلية الاقتصاد

والله بنت العز انحس بنفسي نعرفك والهدية مش ناسيتها وجايتك جايتك وانشاء الله ربي يحقق حلمنا
واحلى شئ انك من اول مادخلتي المنتدى وانت داخلة خاطري

نحنا نحلم بنفس الحلم والعمر اقريب من بعضاء والابراج مائيه مع انى لا اؤمن بلابراج
وانتمنى انتواصل دائما اها حاجه اخرى انا وانتى معلمات

العضــو / ألماس ليبيا بعد التفضل والاجابه على باقي الاسئله

نتمنى منكـِ إختيار عضو ليجلس من بعدكـ على كرسي الاعتراف ..

ولك كل الشكر والتقدير ...

اختي الماس ليبيا

كم كنت اتمنى ان انهال عليكي بالأسئلة

عشان تعرفي المعاناة في الكرسي

ولكن قدر الله وما شاء فعل

واكيد الجماعة ماقصروش مع انهم شكلهم متحشمين منك

ما كثروش في الاسئلة وخيرها في غيرها

ولك مني فائق الاحترام والتقدير

اختار لجلوس من بعد على هذا الكرسي بنت العز