شين ياقطع لارحام للشاعر احمد بورميله الفاخري

شيناه ياقطع الارحام.. اتباعد الناس القرايب
تلقاهم ضنا عم واسلام.. وبينهم اتزيد الغبايب
بعدوات م العام للعام.. عمارهم فنوهن قلايب
اتقول عندهم غيب ليام.. مضمون من جميع الشوايب
مايطولهم جور الايام.. ولا النار يو الحسايب
امنين الجمر تحت الاقدام.. يبقى اتقول قطران ذايب
مكان تنحشر فيه الاقوام.. سماه وصف دخان ثايب
مايمتسك سام في حام.. ولاعبيد عن زيد نايب
ايغيرن علي كل نمام.. حيات ياخنه نهايب
والطايعين لله ف انعام.. وثمار طيبات الهبايب
امثال جابهن فكر كلاّم..كبير سن لله تايب
راه الدم ف الدم عشام.. وراه ادعا المظلوم صايب
سكين تنغرس بين الاكمام.. رقيق شفر مسنون طايب
وراه البطّر سيل هدام.. من الناس دوم لاتعاف هايب
كمين صف له طبل واعلام.. جلاّهم وراحوا ذهايب
سابقينا غير مادام.. دلالهم سنين العجايب
بين ريح وتراب ردام.. القينا اديارهم خرايب
قديم الدهر هك برام.. مع الزين الشين خايب
بلا مواخذه نقد الاكرام .. خلا العقل حاضر وغايب
فلات يحدرن مرط واجمام.. ادموعي عليهم سكايب
ونحوس وينما جيت لوهام.. منازل اسماح الدرايب
ركابين مرفوع الاسوام.. الوافر سليم النجايب
ان كان سامر النار مانام.. ايجيب الطوارف هذايب
امعاك يوقفوا كيف تنضام.. الاجواد هم جمال الصلايب
اصحاب نقب مشهور لمام.. للجالي قليل الحبايب
ينال بينهم طيب الاحلام.. بعيد من هضيب الهضايب
مايخاف ياذيه ذمام.. ايطول فيه بسوال سايب
نزيل ناس هل شيخ لازام.. شديد عزم ينهى العايب
ونجاه واسطة خير يلتام.. ايوازي اكبار المصايب
ايفوت عظم مكسور دمام.. ومازال تحت العصايب
وتبات كلمته قيد ولجام.. للي كلامهم موش رايب
يملوا ابطونهم عيش ويدام.. ويجارحوك بدنا سبايب
لايعرفوا روس الاقلام ..ولا يكبرّوا شيب شايب
علي حكم الاخلاق بعدام.. ملوا م الدراهم حقايب
ولكن بعد جر الارمام.. ورياهم البيض العكايب*
الساع يصبحوا بور وحطام.. ويسوقّن عليهم ضبايب
وعاد كيف بنيان الاهرام.. من غير الربا والنكايب
قول قال خطاط رسام.. اوصاف ناكرين النسايب
لحاليح وشدوق ورام .. وفواه يطلقن في نشايب
حتى بسطهم زفت الانغام.. خليط من انواع الهزايب
ووجوه هل تثوير وخصام.. ان كان انت هاذين هايب
ناسيين تسكير لنسام.. بلحود وثقات الترايب
ومدانات ثعبان هجام.. اعيونه امعاهن لهايب
ينزل الطير لوحام ماحام.. ايقولن امثال العرايب
مايجيبهن لزم لزام.. اخطاهن اطوال النوايب
مامن غني كان غلاّم.. عليه بارمات الزرايب
يفطم فطامين وفطام..وبيوته يجوهن جلايب
بين ضيف طرقي وجلام.. وبين من يشيل الزقايب
وحذاه بركّت قدوا رزام.. فراق من اعراض الجنايب
صدام من هواين صيام.. زمازيم ايقة كتايب
علي نجع نزال قدام.. اجبال عاليات العقايب
كان واختفى شبهة افلام.. وغابت امعاه الدرايب
الدايم الباري العلام.. ناشي اثقال السحايب
اهداء الي اعضاء المنتدي عامه والناس المتخاصمين خاصه اخيكم ابومعاذ

أخى ابو معاذ...برغم اننى لم افهم الكلام كثيرا ففيه صعوبة من حيث الالفاظ المستعملة..لكن يكفينا العنوان..(شين يا قطع لرحام)...اللهم اجعلنا ممن يصلون ارحامهم مادام فى الاعمار بقية

شين ياقطع لارحام للشاعر احمد بورميله الفاخري 926381

تحيه طيبه لاام البنات وربي انشاءالله يخليلك البنات ويحفظهن من كل سوء
ومشكوره جدا علي المرور والتعليق وسوف نأتي بالجديد والغير صعب كل ما قصد ان ينظر في هذه القصيده المتخاصمين مره واثنين وثلاثه حتي يفهموا المعني ،والحمد لله انت لست من قطاع لارحام.
والسلام

حلوة هالمرة يمكن لان الوزن عجبنى ربى يجعلنا من واصلين الارحام دوما وابدا ومقابلة الاساءة بالحسنة مثل ما كان يفعل قدوتنا وحبيبنا سيدنا محمد صلى الله عليه وسلم ربى يبارك فيك تقبل مرورى وتحياتى ..

قال رسول الله صلى الله عليه وسلم ((( لن يدخل الجنة قاطع رحمة )))

قصيدة معبرة ابو معاذ جزاك الله خير

» قصيده بعنوان امغير انواري .للشاعر احمد بورميله الفاخري
» الى محسن الفاخري .الورفلي.المغتربه.لميس
» تعزيه الى محسن الفاخري