قصة حب من مكالمة نقال

مساء الخير

سبق وان قريت مقالة في هدا المنتدى حول هدا العنوان لهدا قررت ان اكتب هادي القصة اللي صارت معاي واللي عايش فيها حتى لحظة كتابتي لهادي السطور.
اسمي علي من مدينة طرابلس في شهر 10/2010 وفي ساعة متأخرة دخلت الى موقع شات ليبيا للدردشة، وبعد فترة لقيت اسم مستعار ملفت لبنوتة من مدينة في الشرق فقلت خلي انهدرز معاها، فضفتها عندي حتى نحكي معاها فرفضت فحاولت ثاني فرفضت،رفضها زادني اصرار وعناد وضليت وراها حتى قبلت وضافتني وحكيت معاها، موقع الدردشة بطئ شوية فطلبت منها نحكو على الياهو ماسنجر وافقت وغيرنا على الياهووكملنا الحديث،بعدها طلبت رقم هاتفها حتى نسمع صوتها، كالمعتاد رفضت لكن بعد جهد واصرار وعناد مني ووعد باني حنحدف رقمها اعطتني الرقم وكلمتها في نفس الليلة.
وسبحان الله شن هالصوت اللي عندها واللهجة الشرقاوية اللي تحكي بيهاعمري ماسمعت زيها في حياتي.بعد المكالمة حدفت الرقم زي ماوعدت وضليت نحكي معاها عالياهو بعد هاديك الليلة، وفي كل ليلة نطلب منها رقمها ثاني حتى نحفظه عندي فترفض باصرار واني مصر اكثر منها حتى اعطتني الرقم ثاني وعرفت بعد مدة انها كانت تبي تتأكد اني فعلا حدفت الرقم ووفيت بوعدي ليها.مرت الايام وكل ليلة نحكي معاها ونتعرف عليها اكثر فاكثر لكن في بعض المعلومات ظلت تخفيهم عليا (اسمها ولقبها،عنوان بيتها،عنوان عملها، وصورة ليها)رغم اني قلتلها كل شئ عليا، الموضوع هدا ضايقني فقررت ان نسعى حتى نعرف هادي المعلومات.
فبديت بالاسم في كل مكالمة نفتح معاها الموضوع ونسأل ونسأل وانحاول نقنعها حتى بعد جهد اقتنعت وقالت اسمها الاول، الحق لما عرفت اسمها حسيت اني قربت منها اكثر. ظلت مشكلة اللقب كيف نعرفه،ظليت انفكر ايام في الموضوع هدا ليل خطرت عليا فكرة نعرف اللقب من شفرة الهاتف،فدخلت على منظومة ليبيانا وهدا سر طبعا وبحتث على رقمها، فلقيته اسم رباعي لشخص،فقلت مرات خوها شاري الشفرة،فلما كلمتها بالليل ظليت انلف واندور حتى نعرف ادا كان في حد من خوتها او اقاربها عنده نفس الاسم الاول لصاحب الشفرة فاتضح مافيش حد بنفس الاسم،فصارحتها بالاسم الرباعي لصاحب الشفرة اندهشت كيف عرفته،الحق عندي مشكلة معاها اني مانقدر نخفي عليها شئ فقلتها كيف فقالت واو منك ياعلي.
من عادتي اثناء حديثي معاها نسأل فيها في اسئلة وسط الحديت تساعدني في الوصول للي نبيه فعرفت انها تسكن جنب مكان (مميز) في مدينتها و عرفت طبيعة عملها، من اهني بديت عملية البحث على عنوان سكنها وعملها وكان في اتفاق اني لو سميت وين هى حتقول صح او خطأ.المشكلة كيف حندير واني من طرابلس وماعنديش معارف في مدينتها،ظليت انفكر ايام حتى جاني الحل،قلت احسن حاجة نستخدم برنامج (جوجل ارث)،فتحت عليه وعلى مدينتها فبسرعة لقيت المكان المميز اللي قالت عليه وظليت ابحث على المكان المحتمل للي تخدم فيه لأني نعرف طبيعة عملها وسميتلها اسماء احياء جنبهم واماكن عمل فترد عليا برسائل نقال وتقول خطأ اعد المحاولة،الموضوع استمر لأيام وايام واني الحمد لله بالي واسع وعندي اصرار وعناد كبير حتى استغربت كيف عرفت اسماء الاحياء واماكن العمل، قلتلها سر حتى نوصل لمكان عملك،بعد ايام من المحاولات الفاشلة تفكرت مرة في حديت انها قالت ان مكان عملها نشروا عليه مقال في منتدى السلفيوم ومن هنا جاء الفرج.
اشتركت في منتدى السلفيوم وضليت اسبوع انراجي في تفعيل الاشتراك وبعدها درت مشاركة وسألت فيها يوجد مكان عمل بالمواصفات اللي نعرفها وقريب من هدا المكان(المميز) فياريت حد يدلني عليه،جاني الجواب الاول خطأ وبعدها جاني الجواب الصح من احد الأعضاء بارك الله فيه ودخلت على المشاركة المكتوبة في المنتدى على مكان عملهاوقريت كل المعلومات ولقيت صور ليه وعرفت اسماء بعض زميلاتها.وقلتلها اسم المكان وكانت صاعقة عليها الحق هداك اليوم طرت من الفرحة.طبعا بالليل سألت شن هو مصدر معلوماتي واني قلبي حنين قلتلها على برنامج جوجل ومنتدى السلفيوم فمن اهني عرفت فعلا مقدار الاصرار اللي عندي.بالنسبة ليا مصدر هدا الاصرار هو انها فعلا انسانة تستاهل ان الواحد يبدل كل الجهد و الوقت على خاطرها.
الاحداث هادي كلها صارت بدون علم زميلاتها حتى انكشف امرها قدامهم لما لاحظوا تغيير عليها ظلوا وراها حتى عرفوا سرها وعرفوا كل اللي صار بينا، مازال عندي حاجة وهي صورتها لحد الان رافضة الموضوع واني مصر عليه حتى بديت انفكر اني نمشي لمدينتها حتى انقابلها.بالنسبة للبيت نعرف مكانه لكن مش بالتحديد.
بعد ثلاثة شهور ونصف كل ليلة انكلم فيها تقريبا مرتين بس صارت ظروف وماحكناش مع بعض انقول راي فيها: هي انسانة رائعة وراقية بكل معنى الكلمة،محترمة في كلامها وألفاضها وتعابيرها،متعلمة ومثقفة بدرجة كبيرة،احترمها بدرجة كبيرة كلامتي معاها اختارهم بعناية ومانقدر على زعلها اطلاقا.وهي توا بالنسبة ليا مش صديقة هي حبيبة انحبها بقلبي وعقلي وفكري واحساسي وكياني، هي نبض قلبي ودم عروقي هي نور عيوني هي احلى حاجة صارت ليا، سبحان الله هدا كله ورغم بعدها عني.
هدا كله صار من هاديك المكالمة القصيرة في شهر عشرة،وديمة انقول ان حظي حلو هاديك الليلة لما اعطتني رقمها،
واللي قلته هدا كله صار من مكالمة صدق او لا تصدق.

علي

اخي ....علي

المهم ان تكون نيتك صافية ومشاعرك صادقة

فبكل تأكيد ستحصل على قلب هذه الانسانة التي يبدو انها قلبت كيانك رأسا على عقب

فصدقا اخي هذه المشاعر التي تملكها قد اصبحت من الاشياء النادرة في زمننا هذا ان لم تكن

معدومة

فالمصيبة كما قال برنارد شو (الحب يستأذن المراة في ان يدخل قلبها أما الرجل فانه يقتحم قلبه دون

استأذان وهذه مصيبتنا )ويبدو ان حبيبتك مازال الحب يستاذن قلبها

فكل أملي ان اسمع عنك وعنها كل خير وان يجمع الله بينكما فكما قال الشاعر

قد يجمع الله الشتيتين بعد ما * يظنان كل الظن ان لاتلاقيا

تقبل مروري ......أمـــــل

اخي علي بأذن الله تلتقي بيها في اقرب وقت ويجمع ربي بينكم بالحلال

توكل علي الله

وربي يوفقك ونسمعو أخبار حلوة

تحياتي

منور اخي القلب الكبير ...

على المشاركة و الصراحة اللي تمتعت بيها

بس سين سؤال

شن بعد هالقصة كلها .. ان شاءالله في خطوة جديدة

و ان شاءالله ربي يوفقك

عجبتني صراحتك والقصه مع انها فيها الكثير من السلبيات بس ربي يوفقكم ويجمع بينكم ب الحلال واناكد على سؤال غسق
شنو الخطوه اللي بعد الجديده؟؟؟؟؟؟؟؟؟؟؟؟؟؟

ان شاالله ربى ايوفق بينكم وتكون نهايه سعيدة

قصة مثيرة جدا
لكن اذا احببت شخصا فليس هناك اجمل من تخبئه بين ضلوعك خوفا من اعين الناس علية
لا أن تكشف كل مايدور معه علنا
والمشكله انه لو سمعت شخصا يتحدث عن حبيبته في مجمع هو اقل من ثلاثة اشخاص مقربين اعتبرة تشهيرا بها مابالك بالتحدث عنها في منتدى فيه يشارك به كل الناس
لا ادري كم عمرك
يمكن ان يكون 18 عاما لتقوم بشيء مماثل
غدا عندما تكبر سترى كم من الصعب الحديث عما تحب امام كل الفئات من البشر
تحياتي
هذا رأيي وأسفة ان سببت ازعاجا لأحد

» نقااااااااااااال من الاخر نقال الرمانة!!!!!!
» مكالمة هاتفية مسجلة لهالة المصراتي