قصيده بعنوان امغير انواري .للشاعر احمد بورميله الفاخري

امغير انواري ..ومالقيت من نفـتش عليه اسراري ..موطي على طرفي
مغـير انعــــــدّه .. قديم الغلا لـسبط مخوتم يدّه
كيف الفريق لقور اللي له مدة .. ذرت عليه الريح ماله طاري
صغيره لقي عمه وبوه وجده .. وخوه الكبير كتاب ربي قاري
انكان جيتهن جايل ايجي من حده.. عندي العقل يضايق ايحوس مداري
مواكير ضرابة هميل الصده .. لريل اللي اقرونه اتقول مذاري
علي نجع زاحاه الزمان وعدا .. سبايل بلا سايل انجيب سهاري
تباعد ولوكان الدموع اترده .. ان يرجع ولاكفّن ادموع انظاري
مغير سريـــــــبه .. تنقد علي الناس كيف انجيبه
وسامع سوايا في عددهن غيبة .. ونا عالسوايا ما انريد انماري
وسكاتي على فاهق القديم وعيبه .. نحلفلك عليه انه سكات اجباري
ولكن تعتني ع اليسار انسيبه .. من يومن على هانتي دراه الداري
الرزق مو على غية اقطاف عطيبه .. غبا وين لو نقعد سنين قواري
امغير اجــــــــراره.. طالن وما عمره نهار توارى
ويزيدن مهاياته ان ريت دياره .. ع البال يخطرن ناظر مناظر ضاري
وسايقات سيات العزيز وناره .. علي افزعي والحجاز ياس اقراري
ورا من مغرغز بالرقيق انظاره.. جريت ودعيت بقي قليل ذراري
جيته وهو فوق العلام قراره .. عازق العصايب من شبوب بداري
وحـرّث اللي لقدار فيه خساره .. ونا ياجماعه ردني بـبــذاري
مغير اخطــــــــوره .. لسبط اللي هالب العاتق دوره
ديما يخايلي وفيه ضروره .. تزيد وينما نذكر خطاه الجاري
ونذكر حباب حازهم تراب اقبوره .. بوادي شوامس هل اطراف سحاري
نـزّالين كانوا في هشاش اديوره .. شابكات حـلا ّب ورتـم واجداري
الدايم الله لقيتا مهجوره .. ديارهم مواريهن رديم الواري
ماتقول شالوا عاليدين اصقوره .. ولا اقتلوا في فج الخلا بـقــّاري
ولا بـرّكوا ادقــَــيني امدورم زَوره .. لجحفت اللي عيونها عيون بحاري
مغير ا بياســـــــــه ..رضيت وينما حـجـّر جميل الباسه
ومنعن مواريده ولاخر داسه .. قباله علي صوبه اركب حمــّـاري
ولاطلت منظرته ولا مجلاسه .. مع جرتي رديت نا وجضاري
وانكان جيتهم جايل يباتوا ناسه.. بلا حرب ليلته حجير طواري
مغير انساتر .. علي ناس كانوا هم القبض الحاتر
واليوم طول مرجاهم غلاهم باتر..كبير ياسهم بايع معاي وشاري
قضيب وضع لاماهم لقيه مقاتر .. انسفه بيش ما يمشن معاه اقطاري
امغير السيــــــــه .. اليوم دون من كانوا اعزاز عليا
تمت خيال ديما يطارح فيا .. سلطانها علي معقب غلاهم زاري
وراهم وما فيهم قضا مقضيه .. بلاش هكذي ضايع مشا مشواري
مغير خطاهــــــــم.. وطول ياسهم لطن ايام غلاهم
الناس العزاز اللي علي سباهم .. مضن اسنين من عمري ونا دهواري
وبين ترك طاريهم وبين رجاهم ..متماسكا ت من عند الخناق افكاري
ادموع كيف سوقات النزيل الجاهم ..عزاءالعين في مول الخدود اتراري

» شين ياقطع لارحام للشاعر احمد بورميله الفاخري
» قصيده بعنوان :ادموعي علي شان نجع المروه
» قصيده للشاعر جمعه بوخبينه