احمول يامو شايل

(( يامو شايل * احمول منعدل واحد , واحد مايل * شديد شد حيل العقل ))

********

احمول عتاله ** احمول شيلهن واعر على الشياله

وهو شالهن بالغصب فرقة حاله ** عطيب الجهد عالوقت غير ايحايل

وهو الوقت زايد عالبسال بساله ** فيه ذايقين الملح ناس قلايل

اللي يشكروا ولغيرهم طباله ** ابقولهم اجواد وهم عقاب وذايل

مداحة اللي عنده طمع فى ماله ** اللي بالحرام امعبيين وكايل

خليك انت فى جاله وهم فى جاله ** بعيد خير من دنوه ردى الفعايل

********
ياما دانا ** احمول ع الغوارب والصلايب قانا

شديد شد حيل العقل فى اصبرانا ** شديد عزم ناسف ع الكتوف ثقايل

اوحيل الحمول ابثقل ميل زمانه ** وفواهق اكبار امخلفات علايل

ايجازيبهن ماقال منهن يانا ** امفيت دمع ف الثلث العقابى سايل

*********
احمول ويامه ** طوح وراه وحليهن قدامه

منهن ايموج اتقول فى دوامه ** انغاب منعدل , مايح جديد " ايخايل
"
تقانن عليه وناويات اختامه ** لكن ابحيل العزم فيهن صايل

صابر وصبره ما ايجيب ندامه ** شفا ايوب صبره من كثير علايل

ويوسف ارمى فى بير شين ظلامه ** وبالكذب جابوهن عليه دلايل

عليك عقل دوخنى بقو عزامه ** سو المنعدل شايل سوا المتمايل

********
ايموج ابنقله ** متصعد وحادر ما شكى من ثقله

سوا المايله شايل سوا المنعدله ** تضايق اوقات وللافراج اتخايل

صاحب السعد يلقي اللي ايحطبله ** وانا سعد عقلي اعزوم تلايل

ولا يجى الحنضل فى مكان الدقله ** ولا البوم موكار النداوى طايل

********
احمول عديده ** امعاهن ايموج وفالحياه تصعيده

ايرمز مع اللي صايبه واتكيده ** ايرد ينعكس نبقى عليه انحايل

انقوله اهموم الوقت موش جديده ** والدنيا فنا واللي عليها زايل

ايقول ربنا ضامن ارزاق عبيده ** عليه متكل رانى وسيع بلايل
********
احمول ثقيله ** فيهن اللى مايح واخذ ميله

والله هو اللي قادر على تعديله ** كلامى امصوقر موش قولت قايل

من ضلع يادم دار له الحليلة ** ونجا نوح من زاعب سماه السايل

وخالق الكون وجاد فى تفصيله ** ودار العبيده فالكتاب دلايل

عظيم هو للى خالق النهار وليله ** وداير احدود الكل طاغي صايل

********
شديد عزم من يوما اوعي شايلهن ** مايلات لا طاحن ولا وصلهن

ترهدن وما يلاه من يعدلهن ** وحازه ابساط معطش وجور قوايل

وزادوا صلايب فوقهن واحملهن ** شقي عظم صادنه نصيب هوايل

وايام عمر لا باتن ولا قيلهن ** والراكب ايقول اللغب عليش اتخايل

ومسع اعيونه للبطال حولهن ** وعارفين حبل الحمل عظمه طايل

وايزيد زايده مسع اخطاه ختلهن ** ولا عزم كى عزمه امفيت قلايل

********

شايل احمول اتشيب ** اثقال غير ما منهن شكى لا ريب

مامن صلايب عالحمول امطيب ** ثقيل حملهن فوق الكتوف عدايل

وفيهن اللي له وقت موش اقريب ** يزاقه مع زق العرا ايتمايل

وانكان قالك صايد هناه و طيب ** عليك ياكبير ,, العقل ,, غير ايحايل

********
ما شكى من داهن ** احمول له زمان ايموج هو وياهن

متصعد ابهن ما سال في مرقاهن ** ولا فى طريقه جن ادروب سهايل

احمول وين ما مالن ايميل امعاهن ** علايل ايسوقن فى رحيل علايل

واجروحه ضميد الوقت ما داواهن ** متقرض ابراس اجلمه دمه سايل

وارياحه اتلاطش فى سحاب سماهن ** عليه من هناك ومن هناك ولايل

واهموم وين هفنّه ايحوس امعاهن ** حوست بناتيل القصيل الحايل

والله هو اللي قادر ايفك عناهن ** عظيم الرجاء فكاك كل وحايل

صلايب صلب ** فوق من احمول زمان فيه ايقلب

ساير ابهن مازال مو متغلب ** من خوف ينقدوه وخوف قول القايل

ما من ادروب امعوكرات امهلب ** مشاهن وحبل الحمل عظمه طايل

وامفيت خالقه مالحد شكى لا طلب ** اللي كل شى فيده وبامره زايل

********
احمول ثقيله ** ومع حملهن ياخوى فيهن ميله

شايل امعاهن عالكتوف عديله ** وطريقه ارمال اسيوفها اتمايل

بطلان غير مو قادر ايقول القيله ** سواق حرش سواقه وسوطه عايل

********
احمول اتكدي ** احمول شيلهن خلف شقا واتردي

ماشي ابهن طاوي جبا ومعدي ** ابهن مانريد انطيح لاانتمايل

ولانريد عينه وين نوصل حدي ** امفيت مالكريم اللي عليه تكايل

جمل من جمل والصبر طوعة يدي ** حتى والحيا ماتمد غير جطايل

وحتي ونا ليام ديما ضدي ** وفي خاطري فشن اكبار غلايل

شايل احمولي خطوتي ماتهدي ** فالوطن متغرب بهمي جايل

وننهى افعيني حد لاتجّدي ** صيورها تفراج كل وحايل

ايام الصغا سا تنقلب وتعدي ** يبدل الله بالخير عام كلايل
********
احمول اكبار ** احمول كيدهن شايل مسا ونهار

احمول لاحقه للقبر لونقبار ** ماهن علي ابنادم احمول سهايل

ياالله ياعالم بكل اسرار ** وعالم خفا صدري وماهو شايل

من ياس داير دور مايندار ** ومايوم رينا ياس زين فعايل

ايريد عزقتي بالقو فوق النار ** غير في اعزومي مالقيش فلايل

ولوكان ماني عالشقا صبار ** ولوكان ماني من اثقال عدايل

ولوكاني لظلم الحيا دنقار ** راني امطوح في سفيل سفايل

********
احمول صلبت ** فوق مالحمول المايله وهلبت

اولافيه عقلي عيب لاأنكلبت ** أولازمزكه لافيه شين خصايل

أوخلفة الدار ابحمد ربي جبت ** وأكراها عليهم هذا قول القايل

ألانا علي شكواي تبت اوشبت ** اوثقلن اخطاي اومشيتي أتمايل

أو "لاحد" تلقا يا امسلف "سبت" ** اومديول في يوم اللقا يا دايل

شديد عزم خيك ....
.....بعد غيبة الشمعة ماعاد إحملت
عودة قوية ياشمعه انستنا...

اهلا بعودتك الشمعه لكن القصيده صعبه مافهمتها

تقبل مروري

» غاب اللى شايل هالعيله