الحلقة الخامسة والآربعون من كراسى الاعتراف مع العضو (رنـوة))

... السلام عليكم ..

.. سؤال: ما هو دخل الطلبه وحادثة الغش بعملك ؟؟؟؟؟؟


... ما هو لاعبك المفضل ؟؟؟

... اللون المفضل ؟؟؟

... شيئ تكرهينه جدآ في طبعك ؟؟؟

... ما رأيك في من يحلف بالله كذبآ ؟؟؟

ولنا عووووووووووووودة .....

بصراحة اسفه علي التقطيع راه من الخط العطيب
راي بصراحة في الجامعة وانا طالبة اتحسها مكان علم ممكن لانا كنا نقروا ونتنافسوا مع بعضنا لكن توا وانا مواضفة فيها خاصة ان مركزي حساس يعني بدون مبالغة انا نحضر في اجتماعات اعضاء هيئة التدريس او اجتماع بالطلبة ثاريت فضائح ومعلومات اولي مرة نسمعها واسرار وصرف ميزانيات مانحكيلكش وين هذا كله متخبي وربي اعلم بيه واي عضو هيئة تدريس جاي من الخرج يبي يشوخ ودير قرارات من راسه ويبدا يعقد الطلبة واما بصراحة لمستوي الطلبة فهو متدني لدرجة ان مهتمين بالموضة وتركين الدراسة ومع هذا كله ينجحوا سلم الواسطة لكن في طلبة يستحقوا النجاح بصراحة هذا رائي وهذا الواقع صدقني ايام ونحن طلبة كنا غافلين علي حاجات واجدة ماشاء الله الطب مهتمين بهم اخر اهتمام بس الهندسة والقانون مانقدرش نحكم عليهن لان مكانه في الجامعة الجديدة
واما الجواب السؤال الثالث اللي دفعني لتغير نجحت من الثالثة اعدادي بتقدير عالي فتم ترشيحي الي علوم والحياة لكن في الجامعة فدخلت بالرغبة واهلي اصروا علي الهندسة وتمت الموافقة عليها والخيرة في اللي اختارها ربي
حرام عليك انا مش دبة وزني توا تضحك عليه انا طبيعتي نحيفة لكن رقم حذائي توا تضحكوا عليه خو هو هو مافيش داعي احرجتني بصراحة 36
شكرا هذا من ذوقك والذوق مش غريب عليك ربي خالق فيك من غادي انا بصراحة ديما سعيدة ونضحك بشكل رهيب يعني مانسكت بكل لكن في مواقف نمسك روحي فيهن لكن الله غالب
حتي في العمل انحاول اني مانضحكش لكن ايصيرن مواقف يضحكن
اسفة ثقلت عليك لكن اعتقد عطيتك الجواب الشافي
اسعدني تواصلك ومرورك شكرا لك ورفلينا جزيل الشكر والامتنان لك لك مني اجمل تحية معطرة
واي اسئلة اخري انا جاهزة مرات نرسب في الامتحان نجحني وخلاص لا نحكي بجد ماتحشم مني

We are back
الكاريزما في أصلها اليوناني تعني الهدية أو التفضيل الإلهي، فهي تشير إلى الجاذبية الكبيرة والحضور الطاغي الذي يتمتع به بعض الأشخاص
ايـــــــــــــــــي
هي القدرة على التأثير على الآخرين إيجابيا بالارتباط بهم جسديا وعاطفيا وثقافيا، سلطة فوق العادة، سحر شخصي

سؤالـــــــــــــي

1-هل تلقى مواضيعك وردودك قبول من الاعضاءومن برأيك اكثر عضو يتمتع بالكاريزما

مشكور اخوي محمد علي اسئلتك انا ماهم حطينا علي هاالكرسي الا علشان القصقصة بس عاد خوذي راحتك ماتشيلش هم انت او غيرك انجوا لللاجوبة
1ـ انا لي 4 شهور في العمل يعني مازلت طازه
2ـ انا مانلومش علي الطلبة لان ايقولك جايتنا سكرتيرة ( بنت صغيره) تعطي فينا اوامر وتفرض رايها علينا لكن انا انحاول نكسب فيهم ونساعد فيهم ونوسع بالي امعاهم لاني الحمدلله نملك وسعة بال عاليه كان تبي نعطيك ماتحشمش مني اصل الطلبة في اللي اكبر مني والاغلبية من عمري زي ماقتلك انحاول نكسبهم
3ـ اكثر شخصية اثرت فيا الطلبة وخاصة احد الطلبة الاوائل اصلا كنت نتافس انا واياه
4ـ اللي يزعلني نوكل عليه ربي وصدقني والله مانكذب انا من نوع اللي يسامح وانسامح بجد وانحبش نشيل في قلبي حقد او زعل بدون مبالغة هذا واقعي بصراحة كم موقف صاير امعاي وانا مظلومة بس انسامح الشخص حتي لو مان يكرهني
5ـ غناوي بصراحة توا تضحك عليا مانعرفش ومانفهمش فيهن اكيد تضحكوا عليا في هذه اسفه بجد ههههههههههههههههههههههههههه
مشكور اخوي واجد علي خفة اسئلتك وربي يوفقك

.... كيف صار اختنا رنوة .....


هلبتي اسئلتي راني قبل .. خوي محمد سعد ...

.. اكيد من غير ما نقولك النظام نظام والله لا ..........

مشكور اخوي الناري
سوالك روعة انا بصراحة في بعض الاعضاء حسيتهم تقبلوا مواضعي وحتي ردودي براحبة صدر اما الباقي مستحيل انعاتبهم لاني مازلت جديدة ومش عارفيني اكويس بعد مايعرفوني توا يتقبلوا مواضعي
بصراحة الشخصية اللي تتمتع بالكريزما انت اخوي اكيد بس كلكم تتمتعوا بالكريزما بس ماحد يزعل مني بصراحة في 3 اشخاص يمتلكوا هم الورفلي والملاك البريء وشاهين برقة وباقي الاعضاء امغير ايسلموا ماحد يزعل ارجوكم هذا رائي بحكم اني نعرف الورفلي من زمان فعلا ذو شحصية مش عادية ماشاءلله عنده حضور هوواللي ذكرتهم بس في وحدين يمتلكوا هذه الخاصية واكيد انا مانعرفهمش بس حكيت علي اللي نعرفهم انشاءلله ماتزعلوش مني واكيد انا ظلمت وحدين واجد بس هذا رائي بصراحة
مشكور اخوي علي مرورك باسئلتك عطرت صفحتي ونورتها

كيف والله جاوبت علي اسئلتك ايكون في علمك انا انحب النظام جاوبت عليك اول واحد كيف صار اكيد صاير لخبطا حاضر توا انعاودلك الاجوبة بعد المغرب بين عليها مش مكتوبتلي السترا امعاك اسفة والله بدون قصد ماقتلكم الخط يفصل عليا مش عارفة كانه لكن حاضر زي ماقتلك الف طلب كيف هالطلب انت امر وادلل بس رضاك علينا ياملاكنا راه تزعل زي المرة اللي فاتت اوكي
مشكور علي التنبيه

.......... الملاك لا يزعل من إخوته وأخواته فالمنتدى .................


......... بس ما تديريهش مكر وتزعليني ............


.... انا في انتظار الاجوبة ...........

هيا ملاكنا انا عند موعدي اسفة مرة ثانية علي التقصير
نبدوا بسم الله
1ـ شن دخل الطلبة نحنا مطالبين بالاشراف هذا غير طباعة الامتحانات مع العلم ان امتحانات الجزئي بدات وبدا الرعب امعاها يعني ايجيك الطالب ويطلب الغش عادي كيف الضحكة بحكم زي ماقلت لانهم من عمري وفي اللي الاكبر مني وايعاودوا يطلبوا مني عادي
2ـ لاعبي المفضل اوربياً وعالمياً دايفيد بيكهام وميسي اما عربياً وافريقياً فهو كريم مطرود( اللاعب الجزائري)
3ـ اللون المفضل هو الابيض والبرتقالي
4ـ شيء نكره في طبعي هو الملل والروتين
5ـ رائي من يحلف بالله كذبا هو اللي بيحلف يمين لازم ياويله من الله ( باب الحارة) لا بجد لازم يتقي ربي سراً وعلناً وان يبتعد عن هذا الطريق ويتوب وربي يهدي كل من يحلف كذبا وربي يجعلنا من الصادقين اللذين يتبعون القول فيتبعون احسنه
انشاءلله اعجبتك اجوباتي ورضيت بجد مش مجاملة مشكور مرة ثانية واي سؤال اخر خوذ راحتك اسال عادي والله حرمت تسالني مرة ثانية

مرحبا بيك اختي انستي المنتدي وهذا شرف كبير لي انك تسالني
حاضر توا انجاوب علي اسئلتك(( احسن حاجة ساهلة))
1ـ الصداقة احلي مرحلة في العمر اهم حاجة صداقة تكون امعاك العمر كلها تذكريها مش صداقة وقتية واهم حاجة الواحد يصدق في التعامل مع الناس
2ـ الحب ماحد يقدر ايعيش بلا الحب هو اساس الصداقة وربي خلق القلب لان هو اللي يبعث الحب بين الناس والحب اساس العلاقة بين اي شخص وشخص
3ـ هن الاثنين لانهن مرتبطات ببعضهن لكن بالنسبة لي الحب لان بعد الناس ايحبوك تمتلك حاجة حلوة والاحلي ان ربي ايحبك ويرضي عليك لان بعد اتحبي الناس او اي شخص اكيد هاتكون صداقة قوية اساسها الحب والتفاهم والمودة
وشكرا اختي علي مرورك بصفحتي واسئلتك فقد اسعدتيني بمرورك
وانشالله ربي يوفقك في الدراسة وانشالله السنة الجديدة خير عليك
تحياتي لكي منور اختي

مساءك سعيد اختي بنت العز اسفة اسفة جدا والله ماشفت اسئلتك
حاضر توا انجاوب عليهن
1ـ انا معني اسمي انحبه جدا لدرجة فوق ماتتصوري بشكل مبالغ فيه واي واحد ايجيه مولود وايقولي اختاري له اسمه انقولهم رنوة بصراحة ماحدش يتقبله وايغيروا الاسم لكن انا عاجبني
معناه قمة او منتهي الفرح والسعادة هو اسم نادر
2ـ بصراحة انا انحب كل الاقسام المنتدي اصلا مافيش قسم عطيب كل الاقسام حلوة
وشكرا علي مرورك الذي اضاء صفحتي واسعدني
تحياتي لكي اختي واسفة علي التاخير بالاجوبه (( راكي تحسابيني غافلة او متجاهلتك قصداً والله لا )) شـــــــــــــــــــــــــــــــــــــــــــــــكــــــــــــــــــــــــــــــــ را

[color=blue][b]

انا ايضا ضيفه جديده في هذا المنتدى الرائع والجميل لذا اتمني ان تكوني صديقتي......
سؤالي؟؟؟
مارايك في الخيانه ؟ اقصد هنا خيانة الرجل ؟ وخصوصا المتزواج ؟"؟؟؟؟
ماريك في قلب امراه احبت شخص حب جما وفعلت له المستحيل وما يطلبه وهو قد خانها وافطر قلبها واصبح هذا القلب مجرد حطام وبقايا اشلاء امراه .......

مرحبتين بيك اختي انستي المنتدي اكيد ان اصدقاء بدون ماتطلبيها وانا اتمني ان اكون صديقتك
<BLOCKQUOTE class="postcontent restore ">
بسم الله

موضوع جريء
فانا في رأئي المتواضع ارى ان سبب خيانة الزوج هو شعور بالنقص يحسه الرجل في نفسه ويحاول ان يوهم نفسه انه لايعاني من هذا الشعور بخيانة زوجته ولو حتى بنظرة الى امراة غيرها

رأيي انه لا يوجد سبب لخيانة الرجل لزوجته الا ضعف ايمانه ..الله تعالى حلل اربع زوجات حتى لا يقع المؤمن بالشرك والعياذ بالله.
بالنسبة للسؤال الثاني فجاوبه ان هذا الحب اصبح ذكري وخلاص لازم ننساه وانا عارفة من الصعوبة ان تنساه لوعزمت التوكل علي الله صدقني هاتنسي كل شيء بالعكس من اول تجربة ماصدفاتش اكيد تقوي شخصيتها وترمي همها علي ربي لان هو الوجيد اللي يبين لنا الخير وين وانقوله حسبي الله ونعم الوكيل هذه ابروحها تكفي
اتمني لكي السعادة دايما وايام مملؤة بالفرح والهناء
مشكورة علي طرحك للاسئلة وعلي مرورك الذي اسعدني


</BLOCKQUOTE>

مساءك سعيد ياشمعة وضوء المنتدي ادامك الله والله لايغيبك انت وكافة الاعضاء المنتدي
شكراً لمرورك الذي عطر صفحتي بكلمات الرقيقة والرائعة فلقد اخجلتني
جواب سؤالك هو كل شيء في هالدنيا قسمة ونصيب واللي كاتبها لي ربي توا اتجني وكان ربي ماجابليش اللي نبيها اكيد فيها الخيرة
مع العلم اني مش شاطرة في الغناوي لكن سؤالك الحمدلله ساهل
نهار رحيله نحفر في قبري وبالهنا ندعيله عزيز تركنا


مشكور جدا جدا علي مرورك العطر
لك كل الود والاحترام

انا جيت .... إشنوا حالك؟؟
نبي نسأل اسئله إشوى ما تخافي؟؟ ليش كاتبه في خانة المدينة {فرنسا}
هل هذا خطا ام خاطرك تمشيلها
كان هذا وجي هههه؟؟
لو كنت انا والملاك ولد البيضاء
وشاهين برقه في زورق في
عرض البحر وحدث عطل في
ذلك الزورق وغرق
وكان عليك إنقاذ واحد منا
من تختارين؟جاك الزر؟؟هاهاها
_مارايك في فرشات المنتدي ؟
وهل لحظت غيابهن؟؟
ومن هي ابرزهن؟
لي عودة يا رنوة اتمني أن تتقبلي
عودتي...

مرحبا بيك علي راسي والله ماعندي ماندير
انا نبي نسالكم كاني طولت علي الكرسي اكيد مليتوا مني مع اني متريحة كامل الراحة ياريت اتخلوني اسبوع اخري
انجوا انجاوب
1ـ طبعاً انا عشت 7 سنوات في فرنسا طبعاً ماليش فترة جاية ليبيا وانفكر نبي نمشي اخر علشان انا مليت (( ههههه انبصر امعاك)) اللي انحكي عليها فرنسا احلامي
انا امنيتي اني نمشي لفرنسا حتي يوم واحد هي وايطاليا بس اكثر حاجة فرنسا نموت فيها وكان هذا السبب اني نسمي المدينة في المنتدي قرنسا هو عبارة عن حلم مش عارفة يتحقق او لا
ماتقولش مرات نمشي ياورفلينا مرات اتجني فرصة دورة لمدة ثلاثة ايام او اسبوع او نغير اتجاهي ونقعد نحضر واتجيني بعثة لفرنسا مع العلم ان فرنسا مسكرة هي وبريطانيا ومصر
2ـ ليش هالسؤال حرام عليك تمكر فيا حرام سؤال محرج فعلا تبي الصراحة والله مانكذب
ننقذ روحي ونسيبكم تغرقوا في البحر علشان نقعد بروحي في المنتدي ونفرد بيه لوحدي
لا بجديات مش انا اللي انديرها انبصر امعاك
لكن بصدق انخليكم انتوا في القارب وانا نخلي روحي نغرق في البحر وننقذكم انتوا ( حرام عليك جيتني علي الوتر الحساس) انتوا غالييين عليا كل واحد ذكرته له معزة خاصة
وعندي حل اخر مرات يعجبك وترضي بيه وهو لو القارب مايسدش او مايشليش الاواحد نقعد انعيط في البحر علشان اتجيني فرقة الانقاذ وتنقذنا كلنا واتجيب امعاها قوارب عرم وواجد اعتقد هيك ننجوا ومايغرق منا حد يعني (( رضيت جميع الاطراف)) يعني مانفقدوا ولا واحد
الله لايغيبك كلكم انشالله حصلت علي الجواب الشافي لكن سؤالك هذا جوابه محتفظه به لنفسه ومانقدرش انقوله علشان ماحد يزعل مني بصراحة انا مانبيش حد يزعل مني لان بصراحة كلكم والله تعزوا عليا معزة فوق ماتتصوروا (( معليش فكني منهن الاسئلة هذه احراج حرام عليك) بس نبي انرد عليك بنفس السؤال ياريت اتجاوبني عليه انت نرجا فيك مش تهرب ههههههههههههه
3ـ فراشات المنتدي ماشاءالله عليهن كلهن طيوبات مع اني مازلت ماتعرفتش عليهن اكويس لكن بصراحة بسرعة مايدخلن القلب لانهن عسل بس في البعض منهن ملاحظة غيابهن منهن ام البنات ورواسي راوبي والمغتربة واسفة من لم اذكر اسمه وانقولهن انشاءالله المانع خير
بصراحة ماحد يزعل مني يافراشات ابرز فراشة للمنتدي هي فراشتين بلاهن المنتدي امكسد ياريت ماحد يزعل مني الله ايسامحك علي هالسؤال توا ينقمن عليا باقي الفراشات هن
(زهرة القلوب ـ غسق)مع احترامي لباقي الفراشات وانتن الخير والبركة بس انا جاوبت بصراحة ماحبيتش نكذب
زي ماقتلك مرحبتين بيك انت وغيرك الله يستر من اسئلتك القادمة
مشكور ورفلينا علي طرحك الرائع للاسئلة (( ايصير منك مذيع في احد القنوات الفنية لانك تمتلك طريقة حوار وطرح للاسئلة روووووعة يعني تمتلك كاريزما وحضور )) راك تاخذ عيني مني

سامحيني أختي رنوة
صايرلي مصار مطافي البيضاء فزعت لمباكر أوديما عاقب لكن نبي نفزع أمعاك
ونقوللهم خففو عليها الاسئلة شوي ونقولك ليش أتحبي التبصري واجد هل للمراوغه او لتشتيت افكار الغير او لكونكي مرحه ؟؟؟؟؟؟ عرفتي سوالي تحياتي

مساءك معطر بماء الزهر اساتذي
سؤالك حلوووو بس غريب ان السبب انبصر واجد هو اني انحب نضحك بس اول ماتقعد حاجة اتضحك مش نضحك وخلاص اصلا بطبيعتي ديما انبصر بس في ناس انحب انبصر امعاهم وفي ناس انحب نقعد امعاهم جدية شوي والناس اللي انحب انبصر امعاهم لقيتهم في هذا المنتدي وهم معروفين طبعاً (( الورفلي ، شاهين برقة، ملاكنا ، زهرة القلوب) وحتي الباقي امغير ايسلموا بس ديما انحب انبصر امعاهم وحتي لو دققت في اسمي تلقاه يدل علي الفرح والسعادة وطبعا الفرح يجلب الضحك
شكرا لطرحك للسؤال وانشالله اتكون عارفت الاجابة واسفة علي الاطالة
واسعدتني بمرورك واي اسئلة اخري تفضل انا جاهزة والله حرمت تسأل علشان اجابتي طويلة

ارق تحياتي

شكلها الاخت رنوه لقيت الكرسى غريب ومريح ّ!!!

والا مشرف القسم صارت فيه حاجه ونحن مش عارفين

نبو عضو جديد والا عضوه على الكرسى ........

وينك يافارس ؟؟؟ ان شاء الله المانع خير ....

مساءك سعيد اخي المخضرم
ااااااااااكيددددددددددددد متريحة في الجلوس علي الكرسي واشاءالله استاذي الفارس المانع خير
لان مازلت مانطردت من عي الكرسي هيا اسبوعي الثالث انتهي واختاروا عضو غيري
كان قاعدت الاسبوع هذا معناها الادارة عاجبهم جلوسي علي الكرسي
راه اخي المخضرم مش مني قعدتي من اساتذي الفارس اسفة كان طولت علي الكرسي
لكن انشاءلله جلوسي مايكونش ازعجتك ومايكونش ثقيل علي باقي الاعضاء
وتفضل كان تبي تسأل اي سؤال
(( علي فكرة اعضاء معيين اللي سألوا مش كل الاعضاء اللي سألوا طول فترة جلوسي
يعني الاسئلة كانت قليلة وخفيفة ))
شكرا لك علي مرورك

لالالالالالالا ابدا مش قصدى يا أرنيوه ...!!!

بالعكس والله ..لكن انت عارفه قوانين الكرسى

هذا ما أردت الاشاره له ... اعتذارى سيدتى

إذا كان ازعجتك .....

حتي انت فهمت قصدي خطأ يعني انا مازعلتش منك لانك من حقك انت وغيرك
انكم تقولوا رايكم صاح انا ابروحي مستغربة كاني طولت علي الكرسي
هذا رايكم ولازم نحترمه ونتقبله
اساتذي راك تزعل مني لاني انا بصراحة مازعلتش منك لانك قلت الحقيقة وهذه هي
قوانين اللعبة بأن العضو مايقعدش اكثر من اسبوع بس انا اخترقت القانون
اساتذي دلعك لأسمي اضاف اليا البهجة والسرور والفرحة
شكراً لك ولذوقك الرفيع