لا للمظاهرات نعم للامن والاستقرار

بسم الله الرحمن الرحيم

اخوتى واخواتى اعضاء المنتدى اريدكم ان نقف يد واحدة والتصدى للمظاهرات والفتن والنهب والسلب ويجب توعية شباب وبنات ليبيا لتحقيق الامن والاستقرار فى ليبيا والمحافظة علية وتبق ليبيا حرة

وسوف يبق شعارنا هو هذا لاللمظاهرات نعم للا من والاستقرار

اللهم احفظ بلادنا من الفتن والتخريب
اللهم احفظ قائدنا الغالى وطول بعمره
الله امين يارب العالمين

فارجو من الاعضاء الانضمام الينا فى شبكة احباء القائد معمر القذافى على الفيس بوك لنكون يد واحدة

وشكرا

لا تعليق!!!

مشكورة

نعم اختى رودى نحن معاك نعم للامن والامان والاستقرار فى بلادنا

ربى يحفظ بلادنا من كل سوء

امين يارب العالمين

مشكورة

عُذرا ...

عن أي مُظاهرات
وفتن ,,
ونهب ,,
تتحدثين ..!!!!
ونقف يد واحدة ,
ونتصدى لمن ...!!!!!!!

أُخية
الشباب واعي ومُدرك بما فيه الكفاية .

.

.

فداك روحي
وأبي وأمي
يا رسول الله

بارك الله فيك على الموضوع فعلا الامن والامان
نعمه من الرحمن
سيدنا اراهيم عندما ترك السيدة هاجر فى وداى
غير ذى زراع
اولا شىء طلبه من ربه هو الا الامن
ربى اجعل هذا البلد امنا
والرزق هو الطلب الثاىى
والله رانا بخير ونرجو فى خير

اعتقد بإن ما حدث في
تونس والأن في مصر
هو دليل كبير علي سياسة إقتصادية
تحزبية تعسفية ضد الشعب
ادي إلي إنفجار الشعب والانقلاب
ضد الحكم ...
وهذا لايمكن أن يحدث في لليبيا
لأن الشعب يحكم نفسه !!!!

بلانا حلوة حلة فكونا من المظاهرات ياشباب]

للاسف

صدأ على الأزهار .. صدأ على حجر المياه .. صدأ على تفاحة المعنى ..
تفقدت بيتي .. لاسقفَ .. لابابَ لانافذةَ لاجدارَ .. كل شيئ تحطم وابتلَ .. حتى أنا ياإلهي تكسرت مثل إناء الزجاج وما عاد لي شفة للكلام

فمــــــــــــــــــاذا افعـــــــــــــــل

هـــــــــــل اشكر جـــــــــــــــلادي

كما تكونوا يسلط عليكم معليش بنعرف حاجة بعد المظاهرات شن ايجي ما فيش اي نتيجة اهي تونس خربت على بعضها وماخصلوا شي وهذه مصر ادمرت وفي الا خير انكسروا وقعد مبارك نحن لا نحتاج الي مظاهرات نحن نحتاج الي تصليح انفسنا ونتقي الله في كل شئ وربي يساعد كل متسبب

هذا الموضوع من يوم يلي لقيته انقهرت بس خفت من الرد في وقتها لأني مختصة في الكمبيوتر

وعارفة انهم اجيبوني بسهولة عشان هكي قريت الموضوع وعضيت على صوابعي من القهر

لكن ما قدرتش نكتب أي تعليق ولا حتى مغلف لأني في هذاك الوقت ماكنتش نقدر نرد عشان

هكي اول شئ خطر على هالموضوع لما جاء النت قلت نبي انشوف رأي كل يلي شاركو اكيدة تغيروانا كنت دائما نتاقش مع زميلاتي في العمل بخصوص المظاهرات كنت انقول انتمنى ليبيا تثور فكان صاحباتي كلهن يهاجمني لا ان شاء ياربي ما فيش مظاهرات ولما كنت انقول في دعوات على الفيس بوك للمظاهرات نسمع كلمة وعد الله يسبق وعدهم خلونا متريحين وحتى لما اتصل بي خوي من خارج ليبيا على الايميل وقال خزنو كل شئ تحتاجوه حيكون في مظاهرات الايام الجاية ويمكن يكون في نقص في المواد الغذائية ساعتها انا نقلت الخبر لباقي اهلي في البيت كان رأي اهلي في وقتها غير تريحي مستحيل ايثورو الليبيين ولما اختي شافتني متحمسة للمظاهرات هاجمتني لحدإنا تعاركنا لكن أنا كنت نتمنا الثورة وفي نفس الوقت ما كنتش نتمناها لأني توقعت إنتقام من القذافي ما داره حدونفس الشئ قلته على رئيس سوريا قلت حتشوفو يلي حيديره في شعبه لو ثارو وطلع توقعي في محله لكن يلي ما توقتش هو ان شبابنا ما شاء الله عليهم كلمة ابطال شوي عليهم

والشئ الثاني الي ما توقعتش طول المدة وفي شئ مضحك هو انه في مكتبنا في مكان عملي كان

فيه صورتين للقذافي صور ورقية كبيرة ملصقة على الساس وكانت فيه معاي في المكتب بنت

من المثابة الثورية وكنت دائما انقول فكونا من هالصور فكان صاحباتي يخافن علي ويقولن اسكتي

مالك ومالهن وبعض الصاحبات كانن يخافن مني يحسابن اندور في كلام منهن المهم ان البنت الثورية يلي كانن خايفات منها طلعت ثورية غير بالاسم طلعت كبدها دم شر مني وفي الاخير انا وياها سكرنا الباب وشرطنا الصورتين وحطيناهن في شكارة وربطناها كويس اتقول نربطو في حشيش وحطيناها في الكناسة بعدين انقلوني لمكتب ثاني فيه صورة للقذافي اكبر من الي قبلها وهالمرة مبروزة مش ورقية وكنت كل صبح وانا جالسة قدامها انقول عطوني الصورة هذه انكسرها كنت نلقى نفس الشئ البعض يقص عالموضوع خايفين مني نطلع ثورية والبعض يقولو ايش تريدي فيها راك اتضري روحك ما عادش تتكلمي عليها اسكتي احسن

طبعا صارت الاحداث والصورة كانت في مكانها وانا من يومها ما داومتش في العمل انتمنا انها مازالت في مكانها

عشان انكسرها براحتي قدام صاحباتي يلي كانن يمنعن في بس هالمرة في العلن مش والباب امسكر

وحتى امي من ايام وانا في الجامعة كل صبح امي لما نطلع اتقول راك اتكثري كلام راك اتودري روحك سبحان الله نذكر روحي في الجامعة تعاركت مع بنت قذافية لما قلت القذافي زعيم الارهاب

لكن البنت هذه أنا انقوللكم انها بنت كويسة بكل معنى الكلمة لكن هي مخدوعة زيها زي كل الليبيين

لأنهم حتى ما كانش عندهم حوش رقاد ارياح عالحديدة وتدافع عن القذافي بشدة اتقول بوها

وهذا طبعا حال زميلاتي في العمل يلي انا متاكدة انهن توة غيرن رأيهن مع انا ما تلاقينش

بعد الاحداث وهذا كان رأي امي وخواتي في الحوش دائما القذافي اكويس حرام عليك حودي عنه

مرات يعشم فيك اتقول شايفاته نبي وعندي ابناء خوي اعمارهم 19 و 20 سنة كانو ديما يا عمتي شن دايرلك ديما اتهاجمي فيه وما كانش في حد يبي يقتنع بكلامي طبعا انا ما انقولش اني امفتحة

والا اذكى من غيري لكن الصراحة اني زمان لما كنت اصغر سن لغاية الثانوي كنت انحب القذافي

موت وحتى لما كانو خوالي وهم مش ليبيين لما كانو يضحكو على شكله ولبسه كنت انتعقد ونهاجمهم واندافع عنه وما كنتش نتحمل فيه شئ لغاية مرة شريت كتاب اسمه حقيقة ادريس

الكتاب من تأليف اللجان الثورية وهو القصد منه تشويه صورة الملك ادريس بس سبحان الله

انا حسيت ان الكلام مش مضبوط وانه الكتاب كله كذب وخاصة لما قريت الكتاب على الوالد

وكان من محبي الملك وضحلي الصورة بعدها شريت كتاب ثاني من مصر يفضح القذافي

ويبين حقيقته من يومها وانا نكرهه بس والله كنت دائما نتخيل نفسي نموت قبل ما انشوف ليبيا

تتخلص منه كانت حاجة مستحيلة وطبعا كلنا كنا خايفيين اتقول مديورلنا سحر نذكر مرة ايام الثانوي

جتنا مدرسة وعي سياسي من سرت درستنا اسبوعين بس بعدين مشت لسرت كانت في حصة الوعي السياسي بنت جنبي تقرأ في كراس الديناميكا لما قالتلها الابلة ليش تقري في مادة اخرى

قالت البنت عندي امتحان قالت المدرسة ليش الديناميكا اهم من الوعي السياسي قالت البنت

الوعي السياسي كلام فاضي الابلة مشت تسجل اسم البنت ولما سألتها عن اسمها والبنت جاوبت

الابلة وجها تغير وسألت البنت عندك اخت في ثالثة ادبي البنت قالت نعم وطبعا هي اختها التوأم وحدة علمي والثانية ادبي لسوء حظ البنت ان اختها الي في الادبي طلعت قايلة نفس الكلمة

قالت الوعي السياسي ما شور شئ طبعا الابلة كانت وحدة سليطة اللسان وكل حصة تمسح فينا الارض وحتى لبسها مكانش محترم قالت وقتها حتشوفي انت واختكت تخيلنا الموضوع تهديد

ثاني يوم يطلبو البنتين وبوهن في سرت للتحقيق بعد اسبوع جونا راجلين من سرت سألو الفصل

عن الموقف كيف صار طبعا الفصبين العلمي والادبي شهدو ان الابلة كذابة والبنات ما قالن شئ

طبعا المدير سبق واتفق معانا على هالكلام وروحن البنات للفصل والابلة ما عادش شفناها من يومها هذين مواقف صارن معاي خلني نكتشف القذافي على حقيقته بعد ما كنت من اشد المعجبين بيه وفيه مواقف اخرى شفتها بعيني تثبت ان القذافي ساحر من حوالي 10 سنوات بس المجال لا يتسع لذكرها لكن على العموم انا خطرت في بالي هذه المشاركة يلي هي من العضو رودي وبعنوان لا للمظاهرات نعم للأمن والاستقرار فكرت نكتب موقفي بالضبط وفي نفس الوقت انا عارفة انه كل الاعضاء يلي وافقو رودي في هذا الرأي كانو مش عارفين شئ وما قروش يلي قريته ولا شافو يلي شفته وبالتالي انا نعذرهم جدا ونتمنى انهم كلهم يغيرو مشاركتم هنا مع ان موقفهم معروف بس نبي نسمع من كل واحد زي ما سمعتو مني بالضبط امتى اكتشفوه وكيف كان شعورهم اتجاهه قبل الثورة انا عشان انكون صادقة معاكم

كان عندي شك في رودي لأن اشتراكها كان في المنتدى فترة المظاهرات في مصر وتونس شوفو التاريخ وما عندهاش اي مشاركة غير هذه هي والعضو ثلاثي العجب طبعا نتمنى ان انكون غلطانة ورودي وثلاثي العجب يدخلو ويصلحو الصورة وارجو انهم يعذروني بس فترتها تخيلت انهم من اتباع القذافي لأن القذافي في هذك الفترة جند 700 شخص للدخول على المنتديات في النت وعرض

علينا انا واخي عبر احد المنتديات العمل معاهم بناء على السرعة في الطباعة بالكيبورد وكان الدفع

الف دولار لليوم من يومها وانا نتحسس من اي مشارك ضد المظاهرات في النت عشان هكي سامحوني رودي وثلاثي العجب وفيه مشاركة اخرى نذكرها للعضو السهم طبعا السهم واضح

انه خارج ليبيا لأنه كان يكتب بجرأة زايدة عن الحد لدرجة خفت منه يكون مدسوس علينا وعلى منتدانا وفي مشاركات جاية حنوريكم ان القذافي كان يحذر من كل مدن ليبيا مرة ومن البيضاء مليون مرة وان منتدانا تحت المراقبة ارجو انكم ترجعو للمشاركات هذه وتقروهم اكويس بالاضافة

<p>لمشاركة اخرى اسمها نعي العمدة انا ما نسيتش شئ من هذه المشاركات ولما صارت الاحداث انتظرت النت بفارغ الصبر عشان نقراهن من موقف مختلف
<p>
<p>

كنت نبي نمشي للمحل يومها بالصدفه خطمت علي جاري وقالي في الطلحي في مظاهره ...
سالته ؟ قتله ؟شن قصتها المضاهره ؟ رد علي وقالي : الشعب يريد اسقاط النظام والله في البدايه ما صدقت وقلت لازم انشوفها مشيت شورها فعلا القيت مجموعه تهتف !! خفت عليهم وقلت اكلاب امعمر سعي يخرطوهم !!مشيت للمحالات نبي نفتح المحل اذكرت بعد ما سمعت جمهور الاخضر ان نادي الاخضر عنده مباراه مع نادي المريخ مشيت انا وصاحبي شور الملعب حكينالهم شن شفنا في امفوز الطلحي كلهم ما صدقوا !! بعدها صارت الثوره وكانت في ليله الخميس ملحمه تاريخيه بدات من مدينة البيضاء وانتشرت في ليبيا كلها بكيت وافرحت واذكرت حتي انا ماكتبته فوق بان الشعب يحكم نفسه وكنت واقسم بالله من جوا قلبي نكتب فيه وهازي عليه علي اسا س تشفيط ..........
ما يعجبني في شخصيتك ياروز العقليه المتطوره النادره الوجود في هذا المنتدي مع كل احترامي لاعظائه......

شكرا للورفلي دائما سباق بالرد وانا احترم ذلك كثيرا وشكرا على رأيك في مشاركاتي

مع العلم اني ركزت في ذلك اليوم على علامات التعجب في تعليقك

وعرفت ان لها معنى